Redaktørplakaten (lulesamisk)
Her finner du Redaktørplakaten på lulesamisk.
Dåjmadiddje vælggogisvuoda ja rievtesvuoda
Dåjmadiddje galggá moalgedimfriddjavuodav, præssafriddjavuodav ja diehtofriddjavuodav bisodit. Dåjmadiddjedagos baktu galggá dåjmadiddje barggat friddja medijáj demokratijjalasj rålla åvdås ja dan åvdås mij suv mielas le sebrudahkaj buorren.
Dåjmadiddjen la persåvnålasj ja ålles åvdåsvásstádus medijá sisanos. Dåjmadiddje galggá namádime riektáv ja gálldosuodjalimev bisodit. Dåjmadiddje galggá åvdedit friddja diehtojuohkemav, ja rabás, rievtugis ja duohtavuoda åhttse journalistihkav. Dåjmadiddje åvdåsvásstádus le bærrájgæhttjat ahte le tjielgga ærádus fáktá ja vuojnnosisano gaskan, ja jut tjielggasit åvddån boahtá makkir sisanov dåjmadahka l buvtadam ja mij la kommersiála sisadno.
Dåjmadiddje galggá åmastiddje almodiddjevuodov tjuovvot ja barggat medijá vuodovuojno ja ulmmemærrádusáj milta. Dán rámma sissŋelin galggá dåjmadiddje bessat iehtja dåjmadusáv stivrrit ja sujna galggá ålles friddjavuohta medijá sisanov ja vuojnojt hábbmitjit ja mierredittjat. Almulasj oajválattja, åmastiddje, kommersiálla aktera jalik makkirak ietjá berustiddjejuohkusa e besa dán friddjavuohtaj sehkanit. Jus dåjmadiddje sjaddá almodiddjevuodo vuosstebælláj navti váj ij la tjoavdedahtte, de galggá virgestis gæssádit.
Dåjmadiddjen la ålles åvdåsvásstádus dåjmadusá dåjmas ja dåjmadusá barggijt stivrri. Dåjmadiddje njuolgga almodiddjáj/stivrraj diedet. Dåjmadiddje l almodiddje/stivra åvdåstiddje dåjmadusán, ja sæmmi båttå åvdås dåjmadusáv almodiddjáj/stivran. Dåjmadiddje máhttá fábmodusáv iehtjádijda sirddet fábmodusájdis milta.
Dát tjielggidus la tjáleduvvam aktisasjbarggon Medijávidnudagáj Rijkkasiebre (åvddåla Norske Avisers Landsforbund) ja Vuona Dåjmadiddjij siebre gaskan,
ja dav li goappátja organisasjåvnå mierredam gålgådismáno 22. biejve 1953, ja rievddadam jagijn 1973, 2004 ja 2019.
Medijávidnudagáj Rijkkasiebrre Vuona Dåjmadiddjij siebrre
Tove Nedreberg (MVR) Hanna Relling Berg (VD)