Redaktørplakaten (sørsamisk)
Her finner du Redaktørplakaten på sørsamisk.
Redaktöören dïedth jïh reaktah
Redaktööre edtja soptsestimmiereaktam, preessefrïjjevoetem jïh bïevnesefrïjjevoetem gorredidh. Sov redaktööredahkoen tjïrrh redaktööre edtja frijje medijaj demokrateles råållan åvteste barkedh, jïh dan åvteste mij sov mïelen mietie seabradahkem dïenesje.
Redaktöören lea persovneles jïh ellies dïedte medijan sisvegen åvteste.
Redaktööre edtja anonymiteetereaktam jïh gaaltijevaarjelimmiem gorredidh. Redaktööre edtja frijje åehpiedehtemem bïevnesijstie jïh ræhpas jïh eerlege journalistihkem eevtjedh mij saetniesvoetem ohtsede. Redaktöören dïedte hoksedh tjïelkelaakan saetniesdaajroen jïh mïelesisvegen gaskem joekehtidh, jïh ihke tjïelke våajnoes mij redaksjovnen sisvege jïh mij kommersijelle materijelle.
Redaktööre tjuara åeliedidh aajhteren bæjhkoehtæjjavåaroemisnie medijan maadthvåaromen jïh ulmienjoelkedassi mietie barkedh. Daan mierien sisnjelen redaktööre edtja redaksjovnem frijjelaakan jïh ovjearohkelaakan stuvredh jïh ellies frijjevoetem utnedh medijan sisvegem jïh mïelh hammoedidh jïh sjæjsjalidh. Byögkeles åejvieladtjh, kommersijelle aktöörh jallh naan jeatjah ïedtjeladtjedåehkie maehtieh daam frijjevoetem baajnehtidh. Jis redaktööre vægkan båata bæjhkoehtimmievåaroeminie maam ij gåaredh loetedh, dan lea dïedte sov barkoem laehpedh.
Redaktööre dam ellies dïedtem åtna redaksjovnen barkoen åvteste jïh doh redaksjonelle meatanbarkijh stuvrie. Redaktööre ryöktesth bæjhkoehtæjjese/ståvrose reektie. Redaktööre lea bæjhkoehtæjjan/ståvroen tjirkije redaksjovnen bijjelen, jïh lea seamma tïjjen redaksjovnen åvteste bæjhkoehtæjjan/ståvroen bijjelen. Redaktööre maahtah faamoem delegeeredh sov elliesfaamoej mietie.
Daate bæjhkoehtimmie lea dorjesovveme laavenjostosne gaskem
Mediebedriftenes Landsforening (tidligere Norske Avisers Landsforbund)
jïh Norsk Redaktørforening,
nænnoestamme gåabpegh organisasjovnijste golken 22.b. 1953, revideereme 1973, 2004 jïh 2019.
Mediebedriftenes Landsforening Norsk Redaktørforening
Tove Nedreberg (MBL) Hanna Relling Berg (NR